25 ноября 2022
Анай кыл вольыт сюресэ поттэ
Школаямы удмуртлыкез жутон но анай кылмес гажан ноку но оз бырылы, со понна ортчытиськом портэм ужрадъёс. Тани туэ но туж пайдаё но тунсыко ортчиз удмурт лулчеберетлы сизем толэзьмы. Кылъя но литературая дышетисьёсмы портэм ужрадъёс ортчытизы. Нылпиос понна радъямын вал станциосъя шудон «Лопшо Педунь дорын куноын», «Кечат-вамат» интеллектуальной шудон, кытын пиналъёс визьзэс сыназы портэм заданиосъя,кудъёсыз герзаськемын удмурт шаерен. Пиналъёс потазы школаысь музеямы, тодматскизы вашкала тирлыкъёсын, кудъёсыз асьме дорысь пыраклы кошкизы ни.
Шумпоттизы пиналъёс удмурт кылэз тодэменызы. Тодо соос кырзанъёс, выжыкылъёс, писпу, тылобурдо, турын-куар нимъёсты. Переменаосы пиналъёс кылзылизы туала удмурт кырзанъёсыз но, уг палэнто соосыз.
Туж тунсыко ортчиз анайёслы сизем «Сабырлы тон, удмурт нылкышно» ужрадмы. Со нуналэ школамы турлы сяськаё возь выл кадь вал, пиналъёс но анайёс удмурт дэремъёсын лыктизы. Паймытизы асьсэлэн эктыны но кырзаны быгатэменызы, анайёс киужъёсынызы но. Ма гинэ карыны уг быгато нылкышно киос. Соос понна Максим Бобров лыдзиз С.Широбоковлэсь «Тынад киосыд» кылбурзэ. Шулдыресь кырзанъёсынызы шумпоттизы «Огпаръёс» ансамбль.
Удмурт кылэз дышетоно-а юанлы пиналъёс тазьы гожто: «Удмурт кылэз дышетоно, анай кыл удмурт адямилэсь лулзэ улзытэ, пуштроссэ чеберма.Удмурт кыл адямиез шонер малпанэ вуттэ. Анай кылэз котькин тодыны кулэ. Вунэтид ке анай кылдэ, ас пушдуннедэ ыштод. Анай кыл вольыт сюресэ поттэ, улонэз яратыны дышетэ»
Тини озьы, кулэ бере удмуртлыкмы пиналъёслы. ойдолэ, дэмен вань улосэн яратом но яратон пычатом будись нылпиосмылы. Мед чузъяськоз чебер удмурт кылмы мукет калыкъёслэн кылъёсынызы чош.
Шулакова Зинаида Петровна, удмурт кылъя но литературая дышетись
